ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ دۇنيەجۇزىلىك بانكتىڭ قارجىلاي جانە تەحنيكالىق قولداۋىمەن جۇزەگە اسىرىپ جاتقان «ەڭبەك داعدىلارىن دامىتۋ جانە جۇمىس ورىندارىن ىنتالاندىرۋ» جوباسى اياسىندا قازاقستاندا تۇڭعىش رەت قىسقا مەرزىمدى وقىتۋ قىزمەتتەرىن ۇسىناتىن ۇيىمداردىڭ ءتىزىلىمى قۇرىلادى. ۇيىمدار مەن وقۋ باعىتتارىنىڭ ءبىرىڭعاي ءتىزىمى قانداي دا ءبىر كۋرستان وتكىسى كەلەتىندەر ءۇشىن ۇلكەن جەڭىلدىك بولماق.
تولىق ءتىزىمدى قۇرۋ ءۇشىن وقۋ قىزمەتتەرىن ۇسىناتىن جەتكىزۋشىلەر وسى ىسكە كەڭىنەن ىنتىماقتاسۋعا شاقىرىلىپ وتىر. نيەت بىلدىرگەن ۇيىمدار ولاردى وڭاي تاۋىپ بەرۋگە مۇمكىندىك بەرەتىن تىزىمگە ەنىپ قانا قويماي، ءاربىر ۇيىم دۇنيەجۇزىلىك بانكتىڭ ادىستەمەسى بويىنشا تاۋەلسىز باعالاۋ راسىمىنەن وتەتىن بولادى. بۇل ادىستەمە ارقاسىندا ۇيىم ءوز قىزمەتتەرىنىڭ ساپاسى قانداي دەڭگەيدە ەكەندىگىن ءتۇسىنىپ، قىسقا مەرزىمدى وقىتۋ جۇيەسىندەگى ءوز ورنىن انىقتاپ بىلە الادى. باعالاۋدان وتكەن ۇيىمدار ساپانى كوتەرۋ، كورسەتىلەتىن وقۋ قىزمەتتەرىن وزەكتەندىرۋ جونىندە كەڭەستەر تۇرىندەگى تەگىن ساباعاتتىق كومەككە قول جەتكىزەدى.
وسى تۇستا ۇيىمداردىڭ بارلىعى ءادىل تۇردە باعالانادى. قانداي مەنشىك تۇرىنە جاتپاسىن، ەلىمىزدىڭ بارلىق وڭىرلەرىندەگى كەز كەلگەن وقۋ ورتالىقتارىنان وتىنىمدەر قابىلدانادى، ياعني ەشبىرىنە شەكتەۋ قويىلمايدى.
ونىڭ ۇستىنە، قىزمەتتەرى ايتارلىقتاي جوعارى باعاعا يە بولعان ۇيىمدار جۇمىسسىز جانە ءوزىن ناتيجەسىز جۇمىسپەن قامتىپ وتىرعانداردى وقىتۋ ءۇشىن تاپسىرىس الۋعا ۇمىتكەر بولا الادى. ال ولاردىڭ وقۋى جوبانى جۇزەگە اسىرۋ اياسىندا تولەنەتىن بولادى.
